Qyrǵyz tarapynyń bastamasymen Memleket basshysy Qasym-Jomart Toqaev Qyrǵyzstan Prezıdentiniń mindetin atqarýshy, Premer-mınıstri Sadyr Japarovpen telefon arqyly sóılesti, dep habarlaıdy Egemen.kz.
Memleket basshylary qazaq-qyrǵyz qatynasyndaǵy dostyq, tatý kórshilik jáne strategııalyq áriptestikti odan ári nyǵaıtýǵa ýaǵdalasyp, ekijaqty baılanystardyń kún tártibindegi ózekti máselelerdi talqylady.
Áńgimelesý barysynda Sadyr Japarov qazirgideı qıyn kezeńde Qyrǵyzstanǵa únemi qoldaý kórsetip, kómek bergeni úshin Qasym-Jomart Toqaevqa jáne jalpy qazaq halqyna alǵys aıtty.
Memleket basshysy Qazaqstannyń Qyrǵyz Respýblıkasymen odaqtastyq qarym-qatynastardy tereńdete berýge beıildi ekenin atap ótti.
– Biz Qyrǵyzstannyń saıası turaqtylyǵy men ekonomıkalyq turǵydan ósip-órkendeýine tilekshimiz. Qazaqstan osyndaı qıyn ýaqytta baýyrlas eldi árdaıym qoldaǵan jáne qoldaı beredi, – dedi Qazaqstan Prezıdenti.